शिवना नदी पुन्हा खळाळली! जायकवाडीच्या बॅकवॉटरने सोलेगावच्या शेतकऱ्यांच्या आशा पल्लवित,
ऊस पट्ट्याला मोठा दिलासा ; सिंचनासाठी पाण्याची चिंता काही काळासाठी दूर,
गंगापूर | महाराष्ट्र राज्य टाईम्स : जायकवाडी धरणाच्या बॅकवॉटरचे पाणी अखेर शिवना नदीमार्गे सोलेगाव शिवारात दाखल झाल्याने परिसरातील शेतकऱ्यांच्या चेहऱ्यावर समाधान फुलले आहे. गेल्या काही दिवसांपासून नदीपात्र कोरडे पडत असल्याने सिंचनाचा प्रश्न गंभीर बनला होता. मात्र आता नदीत पाणी पोहोचल्याने शेतीला नवसंजीवनी मिळाल्याची भावना शेतकऱ्यांनी व्यक्त केली.
सोलेगाव आणि परिसरातील जवळपास ७० टक्के शेतकरी ऊस पिकासाठी शिवना नदीच्या पाण्यावर अवलंबून आहेत. नदीत पाणी आल्यामुळे ऊस पिकाला वेळेवर सिंचन मिळणार असून, उत्पादनावर होणारा संभाव्य परिणाम टळणार आहे. यामुळे शेतकऱ्यांना आर्थिकदृष्ट्याही मोठा दिलासा मिळण्याची अपेक्षा आहे.
शिवना नदीत आलेल्या पाण्यामुळे केवळ ऊस नव्हे तर भाजीपाला, फळबागा आणि इतर बागायती पिकांनाही लाभ होणार आहे. तसेच नदीकाठच्या विहिरी आणि बोअरवेलच्या पाणीपातळीत वाढ होण्याची शक्यता असल्याने संपूर्ण परिसरातील जलस्थिती सुधारण्याची आशा व्यक्त होत आहे.
शेतकऱ्यांनी जायकवाडीच्या बॅकवॉटरचे स्वागत करत, आगामी काळातही अशाच प्रकारे पाणी यावे अशी प्रार्थना केली आहे. कारण शिवना नदीतील पाणी हे या भागातील शेतीचे मुख्य आधारस्थान मानले जाते.
Post a Comment
0 Comments